78 йыл элек һуғышта һәләк булған Башҡортостан һалдаты тыуған еренә ҡайтарылды

Аҡ яулыҡ эсендә һарғайған Ҡөрьән китабы биттәре араһында һаҡланған ғаилә ҡомартҡыһы. Мөнир Әхмәтовтың олатаһы фронттан ебәргән өсйөмөшлө һалдат хаты. Ул иҫке төрки телендә яҙылған

Әлегә тиклем Бөйөк Ватан һуғышы ҡатнашыусыһы Фазылғаян Әхмәтов хәбәрһеҙ юғалғандар исемлеген биләне. Һәм бына 78 йылдан һуң ғына, яугирҙың Тула өлкәһендә батырҙарса һәләк булыуы асыҡланды.

Фазылғаян Әхмәтов ерләнгән ете туғандар ҡәберлегенең береһендә табыла. Ҡаҙыныу эштәре барышында эҙәрмәндәр 43 хәрби хеҙмәткәр араһынан 5 шәфҡәт туташын, 6 офицерҙы һәм һалдаттарҙы сығара. Башҡортостан вәкиле булыуын миҙал аша таный. Асыҡланыуынса, Фазылғаян Әхмәтов яуҙағы ҡаһарманлығы өсөн 1942 йылдың ноябрендә бүләкләнә. Теүәл бер айҙан хәбәрһеҙ юғала.

Илебеҙ Бөйөк Еңеүҙең 75-се яҙын билдәләнгәндә яугир тыуған яҡтарына шаңдау булып ҡайтты. Яҡташтарын һуңғы юлға оҙатырға тотош Дүртөйлө халҡы йыйылды. Фазылғаян Әхмәтовты бөгөн яҡындан белеүсе ҡалмаһа ла, уны халыҡ мемориал таҡтаташҡа уйып яҙылған исем-шәрифе аша таный. Ете тиҫтә йылдан ашыу билдәһеҙлектән һуң бөгөн ул тыуған яҡтарына ҡайтарылды. Эҙәрмәндәр илдең төрлө төбәктәрендә тарихи дөрөҫлөктө булдыра. Юғалған һалдаттарҙың әйберҙәрен, документтарын йә ҡәберҙәрен табып, шәхестәрен асыҡлап, уларҙы туғандарына тапшыра.

Фазылғаян Әхмәтовтың үҙенә тыуған тупрағына аяҡ баҫырға яҙмаһа ла, уның рухы, даны, ә күптән түгел, йылдар аша булһа ла табуты ҡайтты. Бөйөк Ватан һуғышы батыры оло хөрмәт менән ауылында ерләнде.

Яңылыҡтарҙан.

Фото социаль селтәрҙән.