Өфөләге «Рәсәй минең тарихым» паркында «Быуындар хәтере. Бөйөк Ватан һуғышы һынлы сәнғәттә» мультимедия күргәҙмәһе асылды

«Фашистар килде». Алтын көҙ, хозур тәбиғәт мөйөшө һәм үлем. Атып үлтерелгән көтөүсе малай кәүҙәһе, ҡорһаҡтары ҡабарған һыйыр һәм быҙау – һауанан осоп үткән немец самолеты артынан ошондай күренеш ҡалған. Бөйөк Ватан һуғышы йылдарында төшөрөлгән Аркадий Пластовтың был картинаһы 1943 йылда Сталин ҡушыуы буйынса Тегеран конференцияһында күрһәтелгән. Мәғлүмәттәр буйынса, ижади әҫәр Черчиль менән Рузвельтҡа икенсе фронтты асыу ҡарарын ҡабул итергә ярҙам иткән. Әҫәрҙең интерактив вариантын Өфөләге «Рәсәй минең тарихым» паркында «Быуындар хәтере» мультимедия күргәҙмәһендә күрергә була.

Экспозицияға илдең 45 музейынан, шул иҫәптә Третьяков галереяһы, Рәсәй дәүләт музейынан һәм Башҡортостандың Нестерев исемендәге дәүләт художество музейынан картиналар ингән.

Дәһшәтле һуғыш осоро һәм уның төрлө рәссамдар ҡәләме, төҫлө буяуҙар менән сағылышын инсталляцион китаптарҙа һәм интерактив экрандан уҡырға мөмкин. Рәссамдарҙың биографиялары, картиналарға аңлатмалар ҙа бирелә.

Мультимедия күргәҙмәһе 8 залға бүленгән. уларға «Һуғыш башы», «Фронт», Еңеү, «Иҫке яралар, 1960-лар» һәм башҡа исемдәр бирелгән.

Рәмилә Исмәғилева.

Фото социаль селтәрҙән.