“Әхирәтемдең ғәйебе юҡ, бары үҙем...”

Австралияла йәшәгән 27 йәшлек Джо Джилкрист битендәге бәләкәй генә һытҡыны тональ крем менән буяу өсөн әхирәтенең косметика ҡорамалын һорап ала. Бер нисә көндән ул арҡаһында ҡаты ауыртыу тоя. Сыҙай алмаҫлыҡ булғас, дауаханаға бара. Асыҡланыуынса, ҡатын ҡорамал менән бергә һытҡылағы ярылған тире аша үлемесле инфекция индергән — ул умыртҡа бағанаһына барып еткән.

Джилкристың ярты кәүҙәһен фалиж һуҡҡан. Операциянан һуң ғүмереңде инвалид креслоһында үткәрергә тура киләсәк, тип иҫкәрткән табиптар.

Баҡһаң, әхирәтенең битендә иң хәүефле стафилококк табылған. “Әхирәтемдең ғәйебе юҡ, минең иммунитетым түбән булғас, бактериялар бик тиҙ үрсегән”, — тип аңлата хәлде ҡатын.

Джилкрист бер нисә ай дауаханала ята. Инвалид креслоһында көйө улын тәрбиәләп үҫтерә. Өҙлөкһөҙ күнегеүҙәр һәм дауаланыу һөҙөмтәһендә йылдан ашыу ваҡыт үткәс, аяҡтары яйлап хәрәкәтләнә башлай. Ныҡлап аяҡҡа баҫырына өмөтө ҙур, ошо уй әсәне йәшәтә лә инде.https://bash.rbsmi.ru/articles/y-m-i-t/-khir-temde-yebe-yu-bary-em-/