Һаулыҡты ваҡытында хәстәрләгеҙ, тип кәңәш итә Баҡыйҙан Ғаяз Фәтҡуллин

Баҡый ауылынан Ғаяз Фәтҡуллин быйыл 70 йәшен билдәләне. Ул оҙаҡ йәшәү һәм һаулыҡтың серен яҡшы белә. Өлкән йәштә булыуына ҡарамаҫтан, әүҙем һәм дәртле. Был уның сәләмәт йәшәү рәүеше алып барыуына һәм спорт менән шөғөлләнеүенә бәйле. Ҡышын саңғыла, йәйен - ауыл тирәләй йәйәү йөрөй, ҡалҡыулыҡтарға күтәрелә.

Ғаяз Нияз улы ауылда хөрмәтле имам. Ауылдаштары уны ихтирам итә һәм уның кәңәштәренә ҡолаҡ һала. Әйткәндәй, урындағы мәсеттә урындағы халыҡ теннис өҫтәле ҡуйған, хәҙер улар бында теннис та уйнай ала.

Баҡыйҙар - өлкәне лә, кесеһе лә әүҙемлектәре менән башҡаларҙан айырыла. Күптәр, саңғыларҙан тыш, скандинав йөрөүен дә хуп күрә.

Ғаян Нияз улында спортҡа һөйөү бала саҡтан уҡ була. Мәктәп һәм район саңғы ярыштарында ул иң яҡшы һөҙөмтәләр күрһәтә. Ғаиләһе менән Салауат ҡалаһында йәшәгәндә, эштән буш ваҡытта (төҙөлөштә эшләй) яратҡан мауығыуы менән даими шөғөлләнә - саңғыла йөрөй, эшселәр араһында үткәрелгән ярыштарҙа һәр ваҡыт ҡатнаша, ҡала һәм республика ярыштарында сығыш яһай һәм призлы урындар яулай.

Һәр көндө Ғаяз Нияз улы иртәнге намаҙ һәм күнегеүҙәр менән башлай. Тормош иптәше Сәйлә уға был йәһәттән иптәш. Мөмкинлек сыҡҡан һайын саф һауала рәхәтләнеп саңғыла йөрөй, сөнки ашыҡмай ғына йөрөүҙәр организмға һис шикһеҙ файҙа килтерә.

Шулай уҡ ул дөрөҫ һәм файҙалы туҡланыу сере менән уртаҡлашты.

- Иртә яҙын уҡ беҙ ҡатыным менән дарыуҙар, шулай уҡ хуш еҫле сәй өсөн дә төрлө үләндәр йыя башлайбыҙ. Мәҫәлән, әлморон, болон туҡранбашы сәскәләрен, Иван-сәй, андыҙ һ.б. Айырым үҫемлектәрҙе тап яҙын йыйыу яҡшыраҡ, сөнки уларҙа файҙалы матдәләр күберәк була. Шулай уҡ иммунитетты арттырыу өсөн күрәгә, ҡара емеш, йөҙөмдән баллы - сәтләүек ҡатнашмалары файҙалы. Ул шулай уҡ организмды инфекция һәм һыуыҡ тейеүҙән ышаныслы һаҡлай. Ә ҡан баҫымынан балан һәм бал ҡатнашмаһы яҡшы. Баҡсабыҙҙа бик күп ауырыуҙарҙан файҙалы ҡара емеш ҡыуағын үҫтерәбеҙ. Унан ҡайнатма яһайбыҙ. Ғаяз Нияз улы «Сәләмәт тәндә - сәләмәт рух» принцибына таяна һәм башҡаларҙы ла быға саҡыра. Өйҙә компьютерҙа һәм ҡулдарына планшет тотоп ултырмаһындар, ә саңғы, конькиҙа йөрөһөндәр, йүгереү менән шөғөлләнһендәр өсөн йәш быуында әүҙем йәшәү рәүешенә һөйөү тәрбиәләргә кәңәш итә. Сөнки был энергия туплар һәм сәләмәтлекте нығытыр өсөн һәйбәт мөмкинлек.