Әсә һөтөнә еткән ризыҡ юҡ

Сабыйҙы имеҙеү баланы ашатыу ғына түгел, ә ҡатын-ҡыҙҙа әсәлек тойғоһон уятыусы психофизиологик процесс та ул. Имеҙеү әсә менән баланың үҙ-ара мөнәсәбәтен билдәләй, әсәгә баланың үҙенсәлектәрен, уның телен аңларға булышлыҡ итә, сабыйына ҡарата һөйөү уята. Бала имеҙеү ҡатын-ҡыҙҙың сәләмәтлегенә лә ыңғай тәьҫир итә: мастопатия, яман шеш, остеопороз кеүек сирҙәрҙе иҫкәртә. Ҡатын-ҡыҙҙар консультацияһының табип акушер-гинекологы Артур Байсыуаҡов ошо һәм маммологик сирҙәрҙән һаҡланыу тураһында һөйләне. Йөклөлөк буйынса иҫәптә торған ҡатын-ҡыҙҙар лекция тыңланы, үҙҙәрен ҡыҙыҡһындырған һорауҙарға яуап алды. Уларҙың ҡайһы берҙәренең тәүге сабыйҙары тыуа, ә кемдеңдер ике йәки өс балаһы бар. Аралашыу форматында үткән йәнле осрашыуҙа акушеркалар Э.Рафиҡова, Г.Таюпова, Г.Мөхәмәтшина буласаҡ әсәйҙәргә дөрөҫ сабыйҙы дөрөҫ туҡландырыу серҙәрен аңлатты, һөттө һауыу, баланы түшкә дөрөҫ итеп яҡын килтереү буйынса мастер-кластар күрһәтте. Ҡатнашыусыларҙың барыһына ла һөт биҙҙәрен үҙеңә тикшереү тураһында тематик брошюралар тараттылар.